السلام عليكم كنتمناكم كاملين بخير او فأفضل الأحوال كيفما العادة تتمة لدروس مؤلف ظاهرة الشعر الحديث كنا قرينا فالحصص لي قبل جميع فصول مؤلف ظاهرة الشعر الحديث ،دابا غنتعرفو على قيمة المؤلف وعلى المناهج لي عتمدها احمد المعداوي المجاطي فهاد المؤلف او فالتطرق لظاهرة الشعر الحديث او غنتعلمو كيفاش نجاوبو في الإمتحان الوطني.
اذن ادراري نبداو بالمرحلة الأولى :
قيمة الكتاب (غتحتاجها فالمقدمة)
مؤلف ظاهرة الشعر الحديث كيفما كتعرفو كيحتل قيمة مميزة جدا في المكتبة العربية بشكل عام لأسباب كثيرة غنحاول نحددها ليكم هنا بتلاتة الأسباب كبرى.
لا احد يشك في قيمة الكتاب الادبية والنقدية والتاريخية فالكتاب غني ادبيا وزاخر بمادة شعرية متنوعة وحيثيات بيوغرافية متعلقة بمبدعي ونقاد الحداثة الشعرية على حد سواء، بمعنى من حيث المقاربة كان من الكتب اللوالا اللي تناول الظاهرة الشعرية الحديثة من زاوية تاريخية اساسا وتزامن الأمر مع الأزمة والمحنة ديال فلسطين وبالتالي كان عندو اثر اكبر فالنفسية العربية.
السبب الثاني هو الريادة، هو كيتصنف من بين الكتب الأولى عربيا ومغربيا في التأريخ لظاهرة الشعر الحديث الى جانب ثلة من الكتب اللي احتلت الصدارة بحال الكتب ديال الكاتب محمد المنظور, محمد النويهي، نازك الملائكة، احسان عباس، عز الدين اسماعيل وغيرهم من النقاد اللي تناولوا بجرأة مقاربة نقدية لهاد الظاهرة الشعرية الحديثة اخيرا اللي كيتحسب لأحمد المجاطي هي المقاربة المنهجية اللي عتامد وهي مقاربة متنوعة وكان لها سبق تاريخي في توظيف مجموعة من المناهج الحديثة انذاك، مثلا فهاد الكتاب تتلقى المنهج النقد التاريخي النفسي الاجتماعي المنهج الأسطوري الموضوعاتي، وهادو كاملين كانوا مناهج طرية اكاديميا في الفترة لي تألفتيها ظاهرة الشعر الحديث،
فين غادي تجاوبو ولا فين غتوظفو هاد المعلومات؟
فاش يتطلب منكم السؤال ديال ما هي قيمة الكتاب يكفي انك تقول انه من الكتب التي تحسب لها الريادة في مجال دراسة الظاهرة الشعرية الحديثة، اولا من الكتب اللي كان لها سبق التاريخي في توظيف مناهج نقدية حديثة، يعني هادي كلها اجابات ممكنة لسؤال قيمة المؤلف ممكن ديرها في المقدمة ديرها في الخاتمة اولا كجواب مباشر فاش يكون السؤال مباشر ما هي قيمة كتاب ظاهرة الشعر الحديث.
ما هو المنهج المعتمد في كتاب ظاهرة الشعر الحديث؟
اجيو دابا نمشيو لأكتر سؤال كيتحط في الامتحان في مؤلف ظاهرة الشعر الحديث هو ما هو المنهج المعتمد في كتاب ظاهرة الشعر الحديث؟
اولا ما هي المناهج المعتمدة في الفصول اولا كيعطيك واحد المقطع مقتطف من الكتاب وكيقولك شنو المنهج لي تعتمد في الفصل الفلاني؟ المنهج لي تعتمد في كتاب ظاهرة الشعر الحديت بشكل عام كيتسمى المنهج التكاملي اولا المنهج التوفيقي وكل ناقد شنو كيسميه حنا غادي نعتامدو هاد الإصطلاح ديال التكامل، اش كيعني؟ هو منهج يتأسس على روافد منهجية متعددة في التحليل وفي تفسير الظاهرة الشعرية وخصوصياتها وذلك بحسب رؤية الناقد وغايته حيث استند الى المرجعيات المنهجية التالية، يعني باش نوضحو الفكرة دالمنهج التكاملي مثلا انا كناقد بانت ليا فهاد القصيدة فيها شوية متلا من تفسير تاريخي شوية اجتماعي كاين تا واحد البعد نفسي مغيكفينيش غي منهج واحد اذن غادي نعتامد اكثر من منهج وهذا كيتسمى منهج تكاملي او هو لي دار احمد المجاطي.
المنهج التاريخي.
اكثر منهج هيمن على دراسة ظاهرة الشعر الحديث هو المنهج التاريخي، علاش؟ لأن السيد من لول فاش درس ظاهرة الشعر الحديث درسها فواحد الإطار تاريخي محدد و صارم هو من نكبة 1948 حتال 1967, وبالتالي معظم الفصول كدور وكترجع لهاد النقطة التاريخية فين غادي تلقى المنهج التاريخي؟ الى تحطلك مثلا نتا فسؤال في الوطني شنو هو المنهج مثلا المعتمد في الفصل الأول (التطور التدريجي في الشعر الحديث) ، او في الفصل الثاني او غيرها انا غادي نساعدك بهاد النقاط كنلقاو المنهج التاريخي في الفصل الأول، فين؟ فتحقيب الشعر العربي تاريخيا كيبدا لنا هو من الشعر القديم العباسي والأندلسي، كينتقل للشعر الإحيائي، الشعر الذاتي وصولا الى الشعر الحديث، كنلقاو ايضا المنهج التاريخي في الفصل الثاني (تجربة الغربة و الضياع)، الى تذكرتو معايا اول شيء كيدكرو باش يمهد لتجربة الغربة والضياع انه كيربطو اساسا بنكبة 1948, اللي خلات مشاعر الاغتراب والضياع والقلق فنفسية الانسان العربي بشكل عام، والشاعر بشكل خاص، كنلقاو ايضا المنهج التاريخي فالفصل التالت (تجربة الحياة والموت) فاش كيرهن تجربة الموت والحياة اساسا بالفترة التاريخية الممتدة من 48 تال 67 علاش؟ كيقولينا ما بين هاد التاريخين اللي كيرتبطوا بنكبات وبانتكاسات كاينين بعض الأحدات الإيجابية المفرحة وراه تكلمنا عليهم فالفصل التالت وبالتالي راه كيربط هو التجربة تاريخيا بأحداث تاريخية.
المنهج الاجتماعي.
يعتبر المنهج الاجتماعي ايضا من اهم المناهج الي عتامدها أحمد المعداوي المجاطي في مؤلف ظاهرة الشعر الحديث كنلقاوه في الفصل الأول بحيث ربط ميلاد التجربة الوجدانية بتحولات المجتمع المصري في جماعة الديوان، يعني قالينا ان المجتمع المصري عرف مجموعة من التحولات ادت الى الاهتمام بالذات بدل الجماعة وبدل التراث، كنلقاوه ايضا في الفصل الثاني الى تذكرتو معايا باش غيدرس الغربة فالمدينة تيربط الشعور في الإغتراب ديال الشاعر ببرود العلاقات الإجتماعية داخل المدينة...
- المناهج دائما فاش نقول المنهج التاريخي كيربط النص بأحداث تاريخية، المنهج الإجتماعي كيربط النص بالمجتمع ديال الشاعر وهكذا.
المنهج الفني
ايضا من المناهج المهمة لي كنلقاو فظاهرة الشعر الحديث يعني لي كيدرس الظواهر اولا الخصائص والسمات الفنية ديال القصيدة، كنلقاوه في الفصل الأول فاش كيقسم لينا الشعر العربي الى مدارس شعرية، علاش؟ لأنها كل مدرسة شعرية عندها خصائص فنية معينة كيهدر لينا التيار الإحيائي بوحدو وكي حكم عليه بالفشل لأن الخصائص الفنية ديالو كانت رهينة بالماضي كيمر للتيار الذاتي كيدرس الخصائص الفنية كيربطها بالذات والوجدان وغيرها عاوتاني كينتاقل للشعر الحديث ويلا دكرتو بالضبط القسم الثاني ديال الفصل الأول للعنوان ديالو نحو شكل جديد كيركز على الخصائص الفنية للشكل الوجداني والا دثرتو معايا على مستوى اللغة والصورة والايقاع وهادي يعني ببساطة هي الخصائص الفنية واهم حاجة عندنا فين كنلقاو المنهج الفني حاضر وبالقوة وهيمنة في الفصل الرابع (الشكل الجديد) لا عقلتو كيخصصو كامل لدراسة الخصائص الفنية للشكل الجديد، بالوقوف عند نفس المكونات اللغة، الإيقاع، وحتى قضية الغموض و كيفسرها تفسير فني، نمرو الان للمنهج الموضوعاتي.
المنهج الموضوعاتي
واللي هيمن بشكل كبير، كنقصدو بالمنهج الموضوعاتي هو اللي كيدرس لينا الظاهرة الادبية اولا الشعرية من خلال اكتر الموضوعات أي المواضيع هيمنة و انتشارا واضطرابا بين الشعراء، هنا هو درس لينا ظاهرة الشعر الحديث من خلال التيمات التالية : الى عقلتو الفصل الثاني تيمة الغربة والضياع فشعر مجموعة من نماذج الشعراء، وتيمة الموت والحياة عاوتاني عند مجموعة من الشعراء، وبالتالي هنايا انه قارب الظاهرة الشعرية مقاربة موضوعاتية.
المنهج النفسي
ايضا كيفرض نفسو بقوة واحيانا كيكون بشكل ضمني احيانا بشكل واضح ومهيمن، نبداو بالفصل الأول تنلقاو المنهج النفسي بشكل ضمني فاش كيربط لينا القصيدة الوجدانية بالذات، يعني كيقولك ان القصيدة الوجدانية هي تعبير محض عن وجدان الشاعر، وهي انصات للذات وحالتها النفسية والانفعالية، وحتى فاش كيقولينا ان الشاعر الداتي اضطر انه يهرب من الواقع الى الغابة لان نفسو متحملاتش الكذب والزيف ديال الواقع، في الفصل الثاني كلقاو المنهج النفسي حاضر بقوة خاصة في حديث الشاعر عن تجربة الغربة والضياع والقلق اللي عاشها مجموعة من الشعراء وكيعطينا مجموعة من الأمثلة كالاضطراب في الكون وفي المدينة وعلاقة الشاعر المليئة بالغدر والمشحونة بالقلق مع المرأة، وأيضا علاقتو اللي ولات خشبية صنمية مع الكلمة، اخيرا الفصل التالت هنا كنلقاو المنهج النفسي حاضر بشكل ضمني لان اصلا التأرجح بين الموت والحياة هو احساس ضمني بتأرجح بين الاطمئنان والقلق هو صراع نفسي وبالتالي كاين المنهج النفسي.
منهج المقاربة النقدية
تنلقاو ايضا منهج المقاربة النقدية اللي كان فتي آنذاك وكيتحسب لأحمد المجاطي السبق لتوظيفو فديك الفترة. اشناهي نظرية المتلقي؟ هو منهج يدرس العمل الأدبي من خلال اثره الجمالي على المتلقي يعني ما كيربطش الأدب بالمجتمع ولا بالتاريخ ولا حتى بالشاعر نفسو انما كيدرسو فعلاقتو بالمتلقي،.يعني كيفاش تفاعل معاه واش نفر منو واش عجبو او غيرها، فين كنلقاو نظرية التلقي نجده ضمنيا في الفصل الاول عندما درس عوامل انتهاء التيار الوجداني وربطها بنوفور الجمهور من القاصدة الوجدانية بسبب مبالغتها في البكائيات والمرض تنلقاوه ايضا في الفصلين الثالث والرابع الا دكرتو عندما فسر عجز القصيدة الحداتية على اختراق الجمهور والإنتشار بسبب شعور المتلقي بغموضها وكثرة انزياحاتها وخروج لغتها عن المنطق المألوف مما سبب انفصالا كبيرا بين المرسل والمتلقي او بين المبدع والقارئ، يعني هو فسر لينا مشكل الغموض في القصيدة الحداتية بنفور المتلقي اللي ما كيفهمش ما وصلاتوش الرسالة ديال الشاعر وما فهمش اللغة الانزياحية الجديدة،
المنهج الاسطوري
هدا كنلقاوه بشكل كبير فالفصل التالت الا ما قلناش بشكل استتنائي فالفصل التالت عندما قارب احمد المجاطي تجربة الموت والحياة من زاوية اسطورية محضة خاصة اساطير الموز والانبعاث التي جسدت رمزيا واقع الحال المنكوب والمشتت بين الانتصار والهزيمة او بين اليأس والامل. وبالتالي هنايا اعتمد مجموعة من الاساطير لتفسير الواقع المستجد.
وهنا كيفما غتشوفو معايا هاد السؤال ديال المنهج من اقوى واكثر الاسئلة الرئيسية اللي كتحط في الامتحان ديال المؤلفات دابا هانتا ضمنتي نقطة الا مفهمتيش شي حاجة سول فتعليق التحت او غنجاوب نشاء الله. نتشاوفو فدرس اخز الله يسهل عليك و بالتوفيق ان شاء الله.