السلام فهاد المقال هادا غندير الشرح ديال الفصل الأول من مؤلف ظاهرة الشعر الحديث ركز معايا نبداو على بركة الله.
احمد المعداوي المجاطي ألف لينا واحد المؤلف اللي سميتو ظاهرة الشعر الحديث المؤلف هذا كينقسم لربعة ديال الفصول الفصل الأول بعنوان التطور التدريجي في الشعر الحديث و الفصل الثاني بعنوان الشكل الجديد و الفصل الثالث بعنوان تجربة الغربة و الضياع و الفصل الرابع بعنوان تجربة الحياة و الموت (غادي نشرحوهم بربعة كون هاني) غي حنا دابا غنركزو على الفصل الأول اللي كيحمل عنوان التطور التدريجي في الشعر الحديث اللي فيه جوج ديال الأقسام دابا انا غادي نركز غي على الفصل الأول بالأقسام ديالو بجوج يعني غادي نشرح لك وغادي نفهمك شنو كاين فالفصل اول نتا ما عليك دابا غي تعطيني دماغك او تفهم معايا مزيان دابا ركزو معايا مزيان شنو عدنا فالفصل الأول.
الفصل الأول بعنوان التطور التدريجي في الشعر الحديث.
لي كينقسم بدورو لجوج ديال الأقسام القسم الأول لي كيحمل عنوان نحو مضمون ذاتي، و القسم الثاني اللي كيحمل عنوان نحو شكل جديد.
ركزوا معايا هاد احمد المعداوي المجاطي قبل ما يهضر لنا على القسم الأول ولا يدخل فيه قال ثلاثة ديال الحوايج مهمين بحيث قال : "يبدأ الناقد الفصل الأول بالإشارة ان تطور الشعر العربي رهين بتحقيق امرين هما الحرية والإنفتاح الثقافي كيفما كان منفتح فالعصر العباسي و الأندلس"
هادي اول نقطة قالها قالك باش يتطور الشعر العربي خاصو جوج ديال الحوايج الحرية والإنفتاح الثقافي كيفما كان منفتح فالعصر العباسي لأنه فالعصر العباسي كان الشعر مزدهر بالزاف وكان كينفتح على الثقافات الأخرى، شنو قال الناقد (شرح للفقرة المرفقة أعلاه) اول حاجة قالها احمد المعداوي باش يتطور الشعر العربي خاص يتحققو جوج ديال الحوايج الحرية والانفتاح الثقافي كيفما كان منفتح في العصر العباسي هادي النقطة الاولى دخلات للدماغ، غندوزو للنقطة الثانية قال لك : " لكن حرية الشاعر كان مقيدا من قبل النقاد واللغويين الذين قيدوا الشاعر بمجموعة من الأسس" شنو معنى؟ قال لك نقطتين الأولى قالك بأن الشعر و الشاعر كان مقيد يعني خاصو يكتب وفق واحد الأسس و القواعد يعني هوما شنو دارو من داك الإحيائيين من يحيى والشعر اللي كان ميت قالك خاصك تكتب بهاد القواعد اللي كانت شحال هادي بهاد الأسس يعني نظام الشاطرين قافية موحدة... الى اخره، والشاعر اللي ملي كيجي يكتب شي قصيدة ولا مقيد مربوط خصو يكتب بداكشي لي كان شحال هادي متافقين هادي النقطة التانية، التالتة اخر نقطة قالها هناك حركتين تجديديتين هما حركة سؤال الذات و حركة الشعر الحديث، يعني ظهروا جوج ديال الحركات هما حركة سؤال الذات وحركة الشعر الحديث.
من اللخر ثلاثة ديال النقط قالهم الناقد (احمد المعداوي) في المؤلف ديالو قبل ما يهضر على القسم الأول او القسم الثاني اللي هوما : باش يتطور الشعر العربي خاصو يتحقق جوج ديال الأمور الحرية والإنفتاح الثقافي كيفما كان منفتح فالعصر العباسي ثاني حاجة الشاعر مقيد من قبل النقاد واللغويين ثالث حاجة ظهور حركتين حركة سؤال الذات حركة الشعر الحديث، دابا متافقين هادو هوما تلاتة ديال الحوايج اللي قالهوم احمد المعداوي فالبداية ديال المؤلف ديالو ظاهرة لشعر الحديث فالفصل الاول قبل ما يدخلنا للقسم الاول او القسم التاني، دابا عاد غادي ندخلو للقسم الاول وغادي نشوفو شنو كاين فيه فالقسم الاول وفي القسم الاول من الفصل الاول.
القسم الأول نحو مضمون ذاتي
حنا عارفين بأن القسم الأول سميتو نحو مضمون ذاتي ياك؟ يعني (التطور التدريجي للشعر الحديث نحو مضمون ذاتي) ، شنو كاين فهاد نحو مضمون ذاتي؟ يبرز الناقد كيف ان مدرسة سؤال الذات اعادت الإعتبار لهموم الشاعر؟ يعني جات مدرسة سؤال الذات حيت فالأول كانوا احيائيين يعني لي حياو الشعر، هاد سؤال الذات جات مور احياء النموذج يعني مور الإحيائيين شنو دارو؟ عطاو الإعتبار لهموم الشاعر يعني داك الشاعر لي غايجي يكتب غايكتب الهموم ديالو مايبقاش يكتب غير وفق داكشي لي حياوه الإحيائيين خصو يكتب يعبر على الهموم ديالو الى آخره، هانتوما ركزو معايا شنو قال "يبرز كيف ان مدرسة سؤال الذات اعادت الاعتبار لهموم الشاعر التي همشتها مدرسة احياء النموذج التي انشغلت بمحاكاة القدماء في لغاتهم واسلوبهم ومضمونهم (يعني كانت هي كتعاود داكشي اللي دارو القدماء في اللغة ديالهم الاسلوب و المضمون) هذا المضمون الذي حرص شعراء سؤال الذات التجديد فيه بجعله غنائيا ذاتيا" يعني كيركزو على الذات يعني الهموم ديال الشاعر متفقين شنو المعنى ديال القسم الأول نحو مضمون ذاتي يعني جات حركة السؤال الذات لي غادي تعيد الاعتبار الهموم الشاعر.
في القسم الأول من الفصل الأول ديال مؤلف ظاهرة الشعر الحديث عندنا ثلاثة ديال المدارس مدرسة الديوان ومدرسة الرابطة القلمية المهجرية وجماعة ابولو حاول تحفظ هادشي، غنعاود واحد الملخص صغير من لول وبشوية وركز معايا مزيان في الفصل الأول التطور التدريجي في الشعر الحديث تطرق صاحب المؤلف لتلاتة ديال الحوايج اول حاجة قالك باش يتطور الشعر العربي خاصو يتحققو جوج د الأمور الحرية والإنفتاح الثقافي كيفما كان منفتح فالعصر العباسي تاني حاجة الشاعر كان مقيد تالت حاجة ظهور حركتين تجديديتين اللي هما حركة سؤال الذات والشعر الحديث، دخلات للدماغ هادي موراها غايبدا لنا فالقسم الأول، القسم الأول كيبرز فيه الناقد كيفاش مدرسة سؤال الذات اعادة الإعتبار لهموم الشاعر، ماشي بحال مدرسة احياء النموذج لي غير عاودات داكشي لي داروه القدماء وفهاد القسم الأول عندنا تلاتة ديال المدارس الديوان الرابطة القلمية جماعة ابولو هنايا خاصنا نشوفو كل مدرسة شنو كاين فيها فالقسم الأول، غانبداو حنايا بالمدرسة اللولة اللي هي الديوان غانبداو على بركة الله.
مدرسة الديوان
اولا مدرسة الديوان هي حركة تجديدية في الشعر العربي ظهرت في الربع الأول من القرن العشرين على يد عباس محمود العقاد و إبراهيم عبد القادر المازني وعبد الرحمن شكري. سميت بهذا الاسم نسبة إلى كتاب ألّفه العقاد والمازني وضعا فيه مبادئ مدرستهم واسمه "الديوان في الأدب والنقد".
غادي نشوفو اشنو قالت لنا هاد مدرسة الديوان اسهمت في نشوئها التحولات الاجتماعية في المجتمع المصري؟ شكون اللي نشأ هاد الديوان هادا؟ كيفاش نشأت؟ بسباب التحولات الإجتماع في المجتمع المصري. والتلاقح الفكري مع الحضارة الغربية يعني الاصطدام مع الحضارة الغربية. وتقوم هذه المدرسة على فكرة ان الشعر وجدان. جات نيشان من اللخر قالت لك بأن الشعر هو وجدان يعني مجموعة ديال الاحاسيس الى اخره. وكيختلف هاد المفهوم د الوجدان من شاعر الى اخر. كاينين تلاتة ديال الشعراء في المدرسة ديال الزيوان كل واحد فيهم كيفاش عرف الوجدان، عندنا العقاد شاف بأن الوجدان مزيج من الفكر والشعور وعند المازيني هو ما تفيض به النفس من عواطف و عن شكري ينحصر في التأمل في الذات، هادشي لي شفنا في الديوان يعني ساهلة هاد الديوان هادي شكون لي نشأها او كيفاش نشأت؟ شكون لي ساهم في النشوء ديالها؟ هي التحولات الاجتماعية في المجتمع المصري والتلاقح الفكري وعرفوا بأن الشعر هو وجدان وكل واحد من داك الشعراء كيفاش عرف الوجدان بالنسبة ليه متافقين هادي هي مدرسة ديال الديوان دابا غادي ندوزو للمدرسة ديال الرابطة القلمية او الهجرية.
مدرسة الرابطة القلمية (المهجرية)
تجاوز مفهوم الوجدان مع شعراء الرابطة القلمية ليشمل الحياة والكون. يعني هاد مدرسة الرابطة القلمية كيشمل الوجدان بالنسبة لهم الحياة والكون. فقالوا بوجود روابط خفية (كاين واحد الروابط خفية) . تشد الكائن الفرد الى الكون جملة (يعني كاين واحد الروابط اللي كتخلي الفرد او الإنسان ينجذب الى الكون). وان من شأن هذه الروابط الرفع من مكانة الفرد وقد اختلفت سبل العودة الى الدافع عند كل من جبران خليل جبران وميخائيل نعيمة واليا ابو ماضي. عندنا ثلاثة دالشعراء تاهوما فهاد الرابطة القلمية كل واحد فين ولا كيكتب. ركزوا معايا ميخائيل نعيمة انقطع الى التأمل في نفسه. مؤمنا بان ملكوت الله في داخل الانسان. لا مجال لمحاولة التحرر من الفساد، الصلاح والطلح شيء واحد ووجودهما ضروري كوجود الليل والنهار، ميخائيل نعيمة مشى نيشان التأمل في نفسه اما جبران خليل جبران هرب باحلامه الى الغابة يعني فين ولى كيكتب في الغابة يعني الطبيعة كيهرب للطبيعة ما بقاش كيتأمل في الذات. و اليا ابو ماضي استعصم بالخيال هذا مشى للخيال. هاد الرابطة القلمية او المهجرية علاش سميناهم المهجريين حقاش تقريبا الأغلبية ديالهم مهاجرين. شنو بالنسبة ليهم الوجدان؟ الوجدان كيشمل الحياة والكون. وعدنا تلاتة: ميخائيل نعيمة اللي مشى للتأمل في النفس، جبران خليل جبران اللي مشى للغاب يعني الطبيعة، ابو ماضي اللي استعصم بالخيال، هادي الرابطة القلمية دابا غادي ندوزو لآخر مدرسة ولا اخر جماعة.
جماعة ابولو
جماعة ابولو يرى شعراء هذه المدرسة ان الدات هي مصدر الشعر لذلك وجدناهم ينطلقون من تجاربهم الذاتية (يعني كيعبرو على داكشي لي عندهم في الذات) وانا استحضر هنا ثلاثة تاهوما، ابراهيم ناجي الذي كان شعره نتيجة للضمأ الى الحب (يعني الشعر ديالو كان حول الحب) لأنه كان في حاجة اليه، وعندنا الشابي الذي كان مرضه واحساسه بالنهاية ( هذا شاف راسو غادي يودع) سببا فيما ابدعه من شعر يعني بسبب بأنه شاف راسو قرب يودع هو السبب اللي خلاه يبدع في الشعر، وكان فشل الصّيرفي في الحب دافعا إلى ابداع اشعار يتغنى فيها بتجربته، هذا مسكين كلا الدق فالحب فَهادشي اللي خلاه باش انه يتغنى بيه فالاشعار ديالو كما سادت نظرة اليأس في اشعارهم وشاع الهروب الى الطبيعة وتغنوا بالمرأة الحلم، هادو كاملين هاد الجماعات رومانسيين لحقاش كاملين مشاو كتبو في الحب. الديوان لي كتعتبر بأن الشعر هو وجدان العقاد عندو هو مزيج من الفكر والشعور المزيني العواطف شكري التأمل في الذات دزنا للرابطة القلمية لي قالك لي كيشمل الحياة والكون ميخائيل مشى للتأمل في نفسه جبران خليل جبران مشى للغاب يعني هرب للغاب يعني او الطبيعة ابو ماضي استعصم بالخيال عندنا جماعة ابولو لي عندنا فيها ابراهيم ناجي هادو مشاو قالك بأن الدات هو المصدر ديال الشعر عندنا ابراهيم ناجي لي كان الضماء ديالو الى الحب هو لي خلاه انه يكتب الشعر فهاد الاتجاه هدا وعندنا الشابي الإحساس ديالو بالنهاية هو لي خلاه يبدع في الشعر والصيرافي الفشل ديالو في الحب هو لي خلاه انه يمشي فهاد التجربة هادي، دابا سالينا القسم الأول او غادي ندوزو للقسم الثاني وشنو فيه؟ وساهل القسم الثاني يعني ماطولش بزاف.
القسم الثاني : نحو شكل جديد
وفي القسم الثاني المعنون بنحو شكل جديد يبرز الناقد التجديد الذي عرفه الشعر الرومانسي على صعيد الشكل فاللغة صارت لينة شفافة بعيدة عن الفخامة، لغة سهلة ويسيرة قريبة من الحديث اليومي ولغة الشارع (هنا اللغة ولات ساهلة ولى الشاعر يمكن لو يكتب بواحد اللغة قريبة للشارع هادي بالنسبة للغة دابا غادي ندوزو للصورة) اما الصورة فصارت نابعة من التجربة الذاتية ورؤية الحياة حيث يعبر الشاعر عن عاطفة او حالة (هنا الشاعر ولى كيعبر على الهموم ديالو يعني هنا صورة ولا على التجربة الذاتية ديالو وعندنا اخر حاجة الايقاع فعمل الشعراء على التجديد فيه نسبيا من خلال تنويع القوافي لي مغادي تبقاش داك القافية الموحدة لي هي داك البيت التاني فاللخر ديال الكلمة كيبقى يتعاود ديما مغاديش تبقى قافية موحدة والاوزان يعني البحور ميمكنليش يبقى يكتب بحر واحد يعني ولا كيدمج جوج دلبحور ولا كيدمج تا ثلاثة دالبحور يعني هادو هما التلاتة ديال الحوايج لي وقع فيهم التغيير بالنسبة للشكل الجديد اول حاجة اللغة يعني ولات اللغة قريبة للحديت اليومي تاني حاجة الصورة، ولاو كيعبرو بالتجربة الذاتية وثالث حاجة الإيقاع، الشعراء هنايا نوعو القوافي والاوزان هادشي لي كاين في القسم الثاني وهاكا كنكونو سالينا او باش تزيد تفهم او ترسخ المفاهيم فراسك مزيان راه كينين مجموعة من الاختبارات الممتعة تقدر تلقاها فالقسم ديال اللغة العربية، نشاء الله ربي ينجحك الا عندك شي سؤال متنساش طرحو فالتعليقات لتحت.